21.02.2012

Alle zwee Keller sin am Mondååg ganz zu

Middwochs isch ab'm Achte zum zehte Måål Musig mit da 'T-Band' un de Hoheide. Foddo: Dorn

Vun Carsten Blaue
(Iwersetzung: Frank Röger)

Schriese. Des isch'n Oischnitt: Ausgerechelt beim wischdigschde Woifescht vun de Schriesemer Winzer, de Madaisemåårkt, bleibt da "Grååße Zehntkeller" und da "Prowierkeller" vun da Genossenschaft (WG) jetzt åå am Madaisemåårktmondååg, de 5. März, ganz zu. Åånscheinend reagiern die Genosse domit uf die singende Bsucherzååhle åån sellem Dååg. Vor allem da "Oowed fa die Veroine", der mondåågsooweds im Feschdzelt gfeiert werd, derft sich negadiv do ausgewirkt hawe. Dinschdåågs, freidåågs und sunndåågs bleibt da "Prowierkeller" ewefalls zu, un da Dunnerschdååg zwische de Feschtwocheende isch sowiso "ä klåånes Peisel fer all mitnoanner", wie's die Genossenschaft ausdriggt. Åå do sin alle zwee Keller zu. Fa die iwerische Deeg verspricht die WG "neie Oifell" un ä klasse Musigprogrååmm zu neie Zeide.
_______________________________________________

Info:
Der 21. Februar ist der "Internationale Tag der Muttersprache". Mit der die UNESCO sprachliche und kulturelle Vielfalt und Mehrsprachigkeit fördern will.

Mehr zum Thema:
"Witaj" heißt Willkommen
Der Dialekt hat Zeiten und Auswanderung überdauert
Sinn Sie nädd aus Cincinatti? Sinn Sie aus Sinse?
"Isch deed saache: Kupälzisch"
_______________________________________________

De Ufftakt mache am Sååmsdååg, de 3. März, ooweds ab'm Siwene, zum erste Maal "Urig & Echt" im "Grååße Keller" mit Schunkelrunde, ab'm Achte spiele "Martin Böhm und Lourine Tielmann" im "Prowierkeller". Ååm Sunndag, 4. März, werd in de Keller mit der gleiche B'setzung gespielt, "Urig & Echt" fåånge awer schunn um halwa Viere, Böhm und Tielmann schunn um Siwenne åå. Nei isch åå da Ufftritt vun "Garden Party" im Madaisemåårkt-Progrååmm da WG. Da Schenke Klaus un da Bernauers Stefåån spiele am Dienschdååg, 6. März, im "Grååße Keller". Middwochs, 7. März, dåånn's altde Progrååmm: Die Winzer wern im Raahme da Woiprämierung geehrt, dazu spiele ab'm Siwenne "Urig & Echt" im "Grååße Keller". Newedråå im "Prowierkeller" isch ab'm Achte zum zehte Maal die grååß Saus mit da "T-Band" aagsååt, åånsunschde ruht joo da Rescht vum Madaisemåårkt åån sellem Daag. Leisere Teen aam Freidåågoowed, 9. März: Trombeeder Klaus Gaa werd paar vun soine musigåålische Kaammerååde zum "Jazz im Grååße Keller" zååmmedrommeln. Zum ärschde Måål hååt des im vergåångene Jååhr noch dienschdåågs im "klååne" Keller statt gfunne - als Kontraschtprogramm zur SWR-Dancenight im Feschdzelt. In guler Gedåånke vun de Genosse dååmals. Die Jazzååhänger hewe se ne mit erm gule B'such gedåånkt.

Ååm Sååmsdååg, 10. März, soll's in alle zwee Keller noch emol rund geh, im "Prowierkeller" ab'm Achte mit da "T-Band", im "Graaße Keller" ab'm Siwenne mit de "Flamingos". Die spiele dåån do aa zum Ausklåång vum Madaisemåårkt ååm Sunndååg, 11. März, un zwåår in der Zeit vum Elfe bis um Zwåå, vum Drei bis um Siwenne wie vum Achte bis ooweds um Elfe. Ååm Dunnerschdååg will da Gschäftsvierer vun da Genossenschaft die Åånzelheite vum Progrååmm erleidern.

Dåånn werd sicher ååda Madaisemåårktmondååg ä Themåå soi.

Info: "Iwersetzer" Frank Röger ist der Leiter der Volkshochschule Schriesheim/Wilhelmsfeld.

Copyright (c) rnz-online

Autor: Rhein-Neckar-Zeitung